Abstract:
Kilala ang Bonifacio Global City (BGC) bilang lugar na kinatatampukan ng mga pampublikong sining tulad ng mga nangaglalakihang miyural at mula rito ay nabansagang “Instagram-worthy” ang lugar. Sa katunayan, lumitaw ang BGC bilang isang lugar na pinauunlad ng pribadong sektor habang naghahain ng mga pampublikong sining, na siyang lalong nagpatanyag dito. Mula rito, pagtutuunan ng pag-aaral na ito ang relasyon ng pagiging pampubliko ng pampublikong sining sa ilalim ng pribadong sektor. Ipakikilala ng pag-aaral na ito ang BGC bilang tahanan ng mga pampublikong sining at ihahain ang mga nakomisyon na miyural, maging ang proseso sa paglikha nito sa BGC. Iuugnay ang makakalap na datos sa urban regeneration at hentripikasyon bilang pinauunlad ang lugar, maging ang mga Uri ng Kapital ni Bourdieu sa kulturang nililikha nito. Sa paghahanap ng relasyon na nag-uugnay sa pampublikong sining at pribadong sektor na nagkomisyon dito, lumalabas ang mga nasa mataas na gitnang uri bilang tagapamagitan sa mga nabanggit. Makikita na ang mga pampublikong sining ay higit sa porma nito, bagkus ay ang tungkulin at nagagawa nito sa lipunang ating ginagalawan.
