Bulaklakang Moryon: sining at pananampalataya

Abstract

Ang tesis na ito ay isang pag-aaral tungkol sa estetiko at semiotiko ng Bulaklakang Moryon, ang pinakamatandang anyo at tawag sa maskarang sinusuot sa Moryonan na mas kilala sa tawag na Moriones Festival. Ang Moryonan ay isa ring pamamanata ng mga Katolikong Marinduqueño, mapa-babae man o lalaki, bata man o matanda. Ang kanilang panata ay ang pagsusuot ng mabigat na maskara at mainit ngunit napakamakulay na kasuotan. Mayroong dalawang klasipikasyon ang mga Moryon ayon sa mga bukal na Marinduqueño, ito ang Bulaklakan at ang Senturyon. Lumalabas sa pag-aaral na ito na mas sinauna ang Bulaklakan, na may mayaman na kahulugan at pagkakahawig sa ibang Hispanikong tradisyon sa ibang bansa, Nilalayon ng pag-aaral na ito na linawin ang mga konsepto ukol sa Moryonan, lalo na sa Bulaklakang Moryon at ang pagsisismula nito. Upang makuha ang saloobin ng iba’t ibang tao tungkol sa kakaibang maskarang Bulaklakan, gumamit sa pagsusuri ng photo elicitation. Nakita na karamihan sa mga tao, Marinduqueño man o hindi, ay nakakakilala sa maskarang ito, ngunit hindi nila tanto na ito ang sinauna o orihinal na anyo. Ang kaalaman tungkol sa pinagmulan ng Moryonan ay makadaragdag sa Kalinangang Mana o Cultural Heritage ng Marinduque at makapagbibigay ng mas makabuluhan at katangi-tanging pagdiriwang na Marinduqueño.