Ang Pag-aaral ng WOW Philippines: Turismo sa Kamalayang Kultural at Lahing Pinagmulan ng mga Pilipino

Abstract

Matapos italaga ng WTO (World Tourism Organization) ang bansa na “Visit Philippines 2003” noong taong nabanggit inilunsad ng pamahalaan ang “WOW (Wealth of Wonders) Philippines” sa ilalim ng Kagawaran ng Turismo bilang kaugnay na programa. Bahagi din ito ng pagpapalakas ng admininistrasyong Arroyo ng kanyang programg “Strong Republic” matapos niyang palitan sa pinakamataas ng puwesto ng gobyermong Pilipino ang napatalsik na dating Pangulong Joseph Estrada. Layunin ng WOW Philippines na gisingin ang kamalayang Pilipino sa kanyang kasaysayan at kultura sa pamamagitan ng pagsasagawa ng mga programa at proyektong mag-papaalala sa kanyang lahing pinagmulan, kabilang na dito ang kanyang husay at dunong sa iba’t-ibang larangan ng sining na humubog at patuloy na humuhubog sa kultura at lipunang Pilipino; ito ang konseptong “kultural na turismo”. Sa konseptong ito ang naging promosyon ng Kagawaran sa pagpapasigla ng lokal na turismo sa ilalim ng dating kalihim nito na ngayo’y Senador Richard Gordon. Naging layunin ng pag-aaral na ito na ilatag ang programang WOW Philippines--- adhikain, mga proyekto at programa, kabilang na rin ang implementasyon at pamamaraan sa pagtupad ng mga layunin nito sa pagpapasigla ng turismo ng bansa. Tiningnan din nito ang bisa ng WOW Philippines sa pagpapaunlad ng kamalayang Pilipino sa kanyang kasaysayan at katutubong kultura. Naging balanse ang mananaliksik sa paglapat ng mga argumento sa usaping ito bagaman nagbigay ito ng ilang mga rekomendasyon sa mga punto at argumentong mahina.